Nagpasaka og disbarment cases ang National Bureau of Investigation-National Capital Region o NBI-NCR sa Supreme Court Office of the Bar Confidant batok kang kanhi Negros Oriental Representative Jacinto “Jing” Paras ug upat pa ka abogado nga giingong nalambigit sa “honeytrap” plot batok kang Executive Secretary Ralph Recto.
Lakip sa mga gi-reklamo ang mga abogado nga sila Ruy Rondain, Orlando Mendiola, Patrick Criaga ug Josemilio Manuel Apostol nga giingong mitabang sa pag-andam sa mga script ug affidavit sa upat ka babaye nga gi-recruit alang sa maong pamaagi.
Kini nagsunod sa una nang reklamo sa NBI sa Department of Justice o DOJ alang sa qualified human trafficking batok kang Paras, sa upat ka abogado, Batangas 1st District Representative Leandro Leviste ug usa ka talent manager.
Samtang, misupak dayon si Paras sa maong aksyon ug giingon nga kabahin lamang kini sa pagpangdaot ug pagpangipit sa gobyerno batok nila.
Gipasiugda pa sa kanhing mambabatas nga hinimo-himo lamang ang mga kaso nga gipasaka batok nila ug andam silang ibarog ang ilang kaugalingon sa korte.
Nagpabilin usab ang NBI sa ilang posisyon nga adunay igo nga basehan ang ilang mga reklamo aron mapanubag ang mga abogado nga giingong nalambigit sa maong kaso.
