Nagpagawas og pahimangno ang Philippine Institute of Volcanology and Seismology o Phivolcs batok sa posibleng lahar flow sa palibot sa Taal Volcano ug Mt. Pinatubo tungod sa padayon nga kusog nga pag-ulan dala sa habagat.
Sumala sa ahensya, mahimong hinungdan ang kusog nga ulan sa volcanic sediment flow o lahar, mudflow ug pag-agas sa lapok nga tubig ngadto sa mga sapa.
Gipasidan-an ang publiko nga posibleng modagayday ang dagkong bulto sa lahar ug lapok ngadto sa drainage canals ug sa mga ubos nga komunidad.
Sa Mt. Pinatubo, apil sa gipabantayan ang mga sapa sa Zambales nga mahimong makaapekto sa San Marcelino, San Narciso, San Felipe ug Botolan, ingon man sa pipila ka lugar sa Tarlac ug Pampanga.
Sa Taal Volcano, posibleng maanod sa ulan ang naipong volcanic debris ngadto sa mga agianan sa tubig ug Taal Lake, nga mahimong makaapekto sa Agoncillo, Laurel ug Talisay sa Batangas.
Giawhag sa Phivolcs ang mga lokal nga kagamhanan sa mga apektadong lugar nga padayon nga magmonitor ug magpagawas og sayong pahimangno alang sa kaluwasan sa mga residente.
