Nasunog ang usa ka barko nga nagdala sa bandila sa Comoros samtang nag-angkla sa teritoryal nga katubigan sa Romania, human sa mga taho bahin sa bag-ong mga pag-atake gamit ang ‘drone’ sa rehiyon sa Black Sea.
Sumala kang Romanian Defence Minister Radu Miruta, pormal nang giimbestigahan kung ‘drone’ ba ang miigo sa tanker nga Yara J, human usab sa sunod-sunod nga pagsulod sa wala mailhing mga ‘drone’ sa kahanginan sa maong nasud.
Nahitabo ang insidente human usab matala ang pag-atake sa duha ka barko sa baybayon sa Bulgaria, diin ang usa niini hingpit nga nalubog. Tungod niini, gipatawag sa gobyerno sa Bulgaria ang embahador sa Russia.
Gipunting ni Ukrainian President Volodymyr Zelenskyy nga ang sunod-sunod nga pagpamomba sa mga barkong sibilyan sa neutral nga katubigan gihimo sa mga ‘drone’ sa Russia.
Tungod sa nagkagrabeng hulga sa mga ruta sa patigayon ug enerhiya sa Black Sea, gisugdan na sa mga kasikbit nga nasud, lakip ang Bulgaria, Romania ug Turkiye, ang konsultasyon aron palig-onon ang seguridad sa mga barko ug mapanalipdan ang mga teritoryo nga sakop sa NATO ug European Union.
