Patay ang iring human nga naigo sa kilat ang punoan sa lubi sa Purok Lily Valley, Brgy Calumpang ning dakbayan sa GenSan atol sa kusog nga kilat ug dalogdog kagabie .
Sumala sa pahayag sa residenteng si Ricardo Rama, nagpahulay ug natulog ang maong iring sa ubos sa lubi dihang nakuryentihan og namatay.
Gibutyag niini, bag-o pa man nag-ulan pasado alas 7 kagabii mao na lamang ang iyang pagkatingala ug pagkakurat sa dihang nakadungog sila og daw kanyon nga buto nga giubanan sa kusog nga liti.
Paghangad nila sa ibabaw, nakita gilayon nga nasunog ang porsyon sa tumoy sa maong lubi tungod sa kalayo nga namugna sa liti, diin daw gipasiritan kini og gasolinang daling misilaob.
Apan pagka-buntag, mas nahimong misteryoso sa mga tawo ang nahitabo sa punoan tungod kay napaksi ug natangtang ang bahin sa panit sa lubi.
Nasayran usab gikan sa mga residente nga adunay nakakoha ug nakakaplag og daw “bato” sa maong dapit human sa maong pagliti, nga gidudahang maoy nakaigo sa punoan.
Pahayag pa ni Rama, dakong pasalamat gihapon nila nga ang maong punoan sa lubi ang naigo sa liti tungod kay kon wala kini, posibleng didto gayod moigo sa ilang kabalayan ang maong liti.
