Gibutyag sa Philippine Drug Enforcement Agency (PDEA) nga usa ka politiko sa Mindanao ang giingong nagpondo sa usa ka flight nga misulay sa pagpayuhot og droga gikan sa Laos.
Wala gibutyag sa PDEA ang identidad sa politiko, apan giingon lang nga nagbayad siya og P3.5 bilyon para sa usa ka chartered private jet nga unta magdala og 521 ka kilo nga gituohang methamphetamine o shabu.
Na-intercept sa mga awtoridad sa Laos ang mga droga sa Luang Prabang International Airport human midumili ang piloto sa private jet.
Ang suspek, alyas “Fajad,” usa ka Pilipino, gidakop tungod sa pagdala sa gituohang ilegal nga droga.
Laing Pilipino ang giila sa PDEA nga mao ang nag-arrange sa flight para sa ilegal nga droga apan mibiya na siya sa nasud.
Giila usab sa PDEA ang mastermind sa droga, kinsa konektado sa Sam Gor drug syndicate, nga nag-apod-apod sa ilegal nga droga sa Asia-Pacific.
