Nakahimo og bag-ong Guinness World Record ang usa ka hardinero gikan sa Pennsylvania, USA nga si Erik Gunstrom, nga nailhan usab sa angga nga “Eggplant Erik,” human niya mapatubo ang labing taas nga talong sa kalibotan.
Gigamit ni Gunstrom ang Thai Long Green nga klase sa talong nga kasagarang moabot lamang og 20 hangtod 30 sentimetros ang gitas-on. Apan ang iyang napadako nga talong miabot og 54.3 sentimetros.
Niadtong Agosto 2025, una nang nakarekord si Gunstrom sa Guinness World Records human niya mapatubo ang labing bug-at nga talong sa kalibotan nga mitimbang og 3.9 kilos. Apan paglabay lamang sa tulo ka semana, nalupig ang iyang rekord human ang usa ka lalaki gikan sa Switzerland nakapatubo og talong nga mitimbang og 5.078 kilos.
Imbis nga moundang, nangita si Gunstrom og bag-ong hagit ug gisulayan niadtong 2026 ang rekord alang sa labing taas nga talong sa kalibotan.
Gitanom niya ang liso niadtong Abril 1, giatiman sulod sa greenhouse ug gibalhin sa gawas niadtong Mayo. Gigamit usab niya ang organikong mga sagol sa yuta ug maampingong pamaagi sa pagpananom.
Matud ni Gunstrom, dili lamang ang rekord ang iyang gipabilhan kundili usab ang proseso sa pagpananom ug ang kalipay nga iyang makuha gikan sa kinaiyahan.
