Andam makigpulong ang South Korea sa North Korea aron matapos na ang panagbangi taliwala sa duha ka nasod.
Sumala kang South Korean President Lee Jae Myung, importante nga adunay “multi-layered security system” aron malikayan ang pagsamot sa tensiyon taliwala sa duha ka nasod.
Pinaagi usab sa maong panag-istoryahanay, gilauman nga maminusan ang tensiyon sa demilitarised zone o DMZ.
Nagtanyag usab ang South Korean President og praktikal nga pamaagi aron mapugngan ang nuclear ambition sa North Korea.
Nagpadayon usab ang North Korea sa ilang ballistic missile testing nga gikabalak-an sa South Korea, lakip na sa mga silingang nasod sama sa Japan.
Ang panagbangi tali sa North ug South Korea temporaryong natapos human mapirmahan ang armistice niadtong 1953.
Apan wala makapirma ang duha ka nasod og peace treaty, hinungdan nga teknikal nga nagpabilin silang anaa sa kahimtang sa gubat sukad niadto.
Nakaatubang usab ang duha ka nasod og mga tensiyon ug panagsangka sa DMZ sulod sa mga dekada, diin parehong nag-akusar sa usag usa nga maoy nagpasiugda sa kagubot.
