Misaka na ngadto sa 19 ang ihap sa mga namatay tungod sa hiniusang epekto sa monsoon rains nga gipalig-on pa sa mga bagyong Luis ug Maymay, sumala sa National Disaster Risk Reduction and Management Council o NDRRMC.
12 ka tawo na ang ge ka ingong namatay tungod sa mga pagguho sa yuta nga miigo sa Baguio City, La Trinidad ug Atok sa Benguet.
Sa probinsya sa Rizal, upat ka kumpirmadong kamatayon ang natala, samtang tulo ka tawo ang nakalas sa Batangas tungod sa mga pagdahili sa yuta, pagka-kuryente, ug pagkaigo sa natumba nga mga kahoy.
Nakarekord usab og 15 ka nasamdan tungod sa kusog nga pag-ulan, samtang upat pa ka indibidwal ang gikatahong nawala.
Sa pagkakaron, mokabat sa 2.2 milyong indibidwal ang naapektuhan, diin 26,000 ang nagpabilin sa mga evacuation center.
Misaka usab ngadto sa P1.4 bilyon ang kantidad sa kadaot sa imprastraktura, samtang P135 milyon ang kadaot sa sektor sa agrikultura.
Padayon usab ang paghatag og ayuda sa mga hingtungdan nga ahensya sa gobyerno ngadto sa mga pamilyang naapektuhan, diin mokabat na sa P73.5 milyon ang kantidad sa assistance nga nahatag.
