Nagpadayon ang pagpahuman sa bag-ong relocation site alang sa mga vendors sa Central Public Market aron mahatagan sila og luwas, organisado ug legal nga kapwestohan.
Sa pakighinabi sa Bombo Radyo, gibutyag ni Market Supervisor Paulito Maquilang nga nahuman na ang pagpahimutang sa mga metal frame alang sa mga pwesto sa mga vendors nga ibalhin gikan sa Magsaysay Street ngadto sa Roundball area.
Matud pa niya, sunod nga pagabuhaton ang pagbutang sa mga divider sa matag stall aron mas maorganisa ang mga pwesto, ingon man ang pagkompleto sa mga kinahanglanong pasilidad sa ubang relocation areas, lakip na ang dapit sa Cemetery.
Gibanabana nga mokabat sa 1,500 ka lehitimong vendors ang mapahimuslan sa maong relocation site.
Gilauman sa City Economic Management and Cooperative Development Office (CEMCDO) nga pinaagi sa maong proyekto, mahatagan og permanente ug hapsay nga kapwestohan ang mga vendors, samtang mapadayon usab ang paghaw-as sa mga sidewalk ug karsada aron mas masayon ang dagan sa trapiko ug masiguro ang kaluwasan sa publiko._
