GENSAN- Gipakusgan sa City Government ug Department of Education ang mga lakang sa seguridad sa mga pampublikong eskwelahan sa General Santos City human sa online threats nga nakahatag og kabalaka sa duha ka mga eskwelahan sa siyudad.
Sumala ni City Administrator Shandee Llido Pestaño, gihisgutan na kini sa meeting tali sa DepEd, City Mayor, ug Local School Board diin giuna ang pagpalig-on sa seguridad ilabina sa pagsulod sa mga estudyante sa eskwelahan.
Matud niya, adunay pipila ka mga pribadong eskwelahan nga nagpatuman na sa paggamit og transparent nga bag o envelope aron masayon ang inspeksyon sa mga gamit sa mga estudyante.
Dugang pa ni Pestaño, nagbutang na usab ang DepEd og mga mekanismo aron malikayan ang susamang mga hulga sa umaabot.
Gipadayag usab sa opisyal nga magpulong pag-usab ang City Mayor ug ang DepEd karung semanaha aron hisgutan ang dugang pang mga lakang alang sa seguridad sa mga eskwelahan.
Samtang, gibutyag ni Pestaño nga usa sa mga gihisgutan sa Local School Board ang posible nga pagpalit og mga kagamitan sama sa metal detectors ug uban pang security equipment gamit ang pondo sa board aron mapugngan ang pagpasulod og mga deadly weapons ug malikayan ang susamang mga insidente sa umaabot.
