Kritikal ang kahimtang sa usa ka 9-anyos nga batang lalaki human kini aksidenteng napusilan sulod sa usa ka balay sa Arka Farm Nierre, Barangay San Isidro, ning syudad alas-5:00 kagahapon, Agosto 3.
Sumala kang Police Major Fermin Sadaypan, Station Commander sa San Isidro Police Station, nakadawat sila og report gikan sa mga concerned citizen sa natigayong insidente maong ilang girespondehan dayon ang maong lugar.
Sa pag-abot sa mga kapulisan, ilang nakita ang mga timailhan sa dugo sulod sa panimalay, apan wala na nila makit-i ang armas nga giingong nakapusil sa bata.
Sa inisyal nga imbestigasyon, nagdula ang biktima ug usa pa ka menor de edad dihang kalit lang mibuto ang pusil nga ilang gigunitan, hinungdan sa pagka-angol sa bata.
Gidali pagdala ang biktima sa usa ka ospital aron matambalan ug padayon pa kini nga giatiman sa mga doktor.
Sa pagkakaron, nagpadayon ang kapulisan sa ilang imbestigasyon aron mahibal-an kung giunsa pag-abot sa armas sa mga bata ug kinsa ang tag-iya niini, samtang gipangita na usab ang pusil nga gigamit sa insidente.
