Gipahugtan na ang koordinasyon tali sa Gensan City Schools Division Office ug Philippine National Police (PNP) kalabutan sa mikatap nga bahad sa social media batok sa SPED-San Isidro ug Buayan National High School.
Matud ni Gensan Schools Division Superintendent Isagani Dela Cruz, seryoso man o dili ang maong hulga, angay gihapon kini hatagan og hustong pagtagad.
Iyang gipasabot nga tungod kay police matter ang maong insidente, ilang gireport dayon kini sa PNP aron makahimo og tukmang aksyon ug mapalig-on ang seguridad sa mga eskwelahan sa siyudad.
Wala pa usab matino sa DepEd kung estudyante ba o kinsa ang responsable sa maong post tungod kay kulang kini og detalye.
Samtang, nakigpulong na ang mga opisyal sa SPED-San Isidro ug Buayan National High School sa mga personahe sa Gensan City Police Office alang sa pagpalapad sa imbestigasyon.
Gawas sa koordinasyon sa PNP, nakig-alayon usab ang DepEd sa mga opisyal sa barangay aron dugangan ang pagbantay sa seguridad sa maong mga eskwelahan.
Gihingusgan ni Dela Cruz nga dili angay himuon sa bisan kinsa ang pagpanghulga, ilabi na kung makahatag kini og kahadlok sa mga estudyante ug makalapas sa ilang katungod.
Matud niya, importante nga mapanalipdan ang kaayohan ug kaluwasan sa mga kabataan maong ilang gihatagan og seryosong atensyon ang maong insidente pinaagi sa pakigtambayayong sa mga awtoridad.
