Bisan pa nga naanad na ang ubang dugay nang nagpuyo sa Japan sa sunod-sunod nga paglinog, nagpabilin gihapon sa kahadlok ang pipila ka residente human sa kusog nga magnitude 7.1 nga linog nga miigo sa maong nasud.
Matud ni Rommel Inoncillo, Bombo International Correspondent (BIC) sa Yamamoto, Japan, daghang residente ang mipili nga magpabilin sa mga evacuation center tungod sa kabalaka ug tungod kay dili sila naanad sa kusog nga pag-uyog sa yuta.
Sumala pa niya, ang maong panghitabo usa ka dakong kahadlok ilabina sa mga naapektuhan nga pamilya, bisan pa man nga adunay mga residente nga dugay nang nagpuyo sa Japan ug nasinati na ang mga linog.
Dugang pa ni Inoncillo nga paspas ang aksyon sa gobyerno sa Japan human sa kalamidad, ilabina sa paghatag og tabang, relief assistance, ug uban pang panginahanglanon sa mga residenteng naapektuhan.
Gipasigarbo usab niya ang kahandagon ug organisadong pagtubag sa mga otoridad sa Japan aron masiguro ang kaluwasan sa mga mamamayan human sa kusog nga paglinog.
