Gikuwestiyon sa pipila ka senator-judge ang desisyon sa Senate Impeachment Court nga tugotan ang pag-subpoena sa mga financial records ni Vice President Sara Duterte.
Una nang giaprobahan sa impeachment court ang hangyo sa House prosecution panel nga makakuha og bank records, financial documents, ug Anti-Money Laundering Council (AMLC) records nga may kalabutan kang VP Sara, sa iyang bana nga si Atty. Manases Carpio, ug pipila ka mga negosyo nga gilangkit kanila.
Matod sa prosekusyon, importante kini aron masuportahan ang alegasyon sa giingong dili mapatin-aw nga yaman nga gilakip sa Article II sa impeachment complaint batok sa Bise Presidente.
Tungod niini, gikuwestiyon ni Senator-Judge Alan Peter Cayetano si House prosecutor Chel Diokno kung mahimong gamiton sa paglitis ang mga transaksyon nga nahitabo sa wala pa mahimong Ikaduhang Presidente si VP Sara.
Sumala ni Cayetano, base sa desisyon sa Korte Suprema sa kaso nga Duterte v. House of Representatives, ang usa ka impeachable act kinahanglan adunay kalabutan sa kasamtangang termino ug posisyon sa usa ka opisyal.
Apan matod ni Diokno, wala gidid-i sa Korte Suprema ang paggamit sa mga ebidensya nga nahitabo sa wala pa mahimong impeachable officer ang usa ka opisyal, ilabi na kung adunay kalabutan kini sa isyu sa integridad ug kabtangan sa usa ka opisyal.
Gipasabot ni Diokno nga ang maong desisyon sa Korte Suprema may kalabutan sa constitutional one-year ban sa pagpasa og impeachment complaint human sunod-sunod nga mga reklamo ang gisang-at batok kang VP Duterte.
Matod pa niya, wala’y problema sa pamaagi sa impeachment proceedings nga ginahimo karon sa Senado.
Apan giinsistir ni Cayetano nga dili mahimong pasagdan lamang ang mga prinsipyo nga gilatag sa Korte Suprema, ilabi na kung kini usa ka desisyon sa maong korte.
Samtang, sumala sa prosekusyon, importante ang maong mga rekord aron mahibal-an kung adunay igo nga ebidensya sa mga alegasyon sa betrayal of public trust batok kang Sara Duterte.
