Gihagit sa House prosecution si Bise Presidente Sara Duterte nga ipatin-aw ang gigikanan sa iyang mga kabtangan ug ang giingong kalainan sa aktuwal nga kantidad niini kumpara sa iyang gipahayag sa Statement of Assets, Liabilities and Net Worth o SALN.
Matud ni House prosecution legal spokesperson ug private prosecutor Atty. Benjamin “Jay” Tolosa Jr., dili igo ang yano nga paglimod sa depensa sa mga alegasyon, hinunoa kinahanglan nilang ipatin-aw kon giunsa pag-angkon ang mga kabtangan nga nadiskubrehan sa pagsusi ug nganong wala kini tanan maapil sa SALN sa Bise Presidente.
Base sa pag-analisa sa forensic accounting expert nga si Alexander Cabrera, mokabat sa labing menos P817.87 milyon ang giingong wala maideklarang mga kabtangan ug dili mapatin-aw nga bahandi nila Duterte ug sa iyang bana nga si Manases Carpio gikan sa 2022 hangtod 2025.
Posible pa kining mosaka sa P1.5 bilyon depende sa mahimong pagtimbang-timbang sa mga utang ug buhis.
Samtang, mokabat lamang sa P98.66 milyon ang net worth nga gideklara ni Duterte sa iyang 2025 SALN.
Matud ni Tolosa, itandi usab sa prosecution ang mga nakuhang kantidad ngadto sa kinitaan sa Bise Presidente nga gi-report sa Bureau of Internal Revenue o BIR.
Nahuman na sa House prosecution ang pagpresentar sa ilang mga ebidensya kalabot sa Article II human gibawi ang tulo ka impeachment articles nga may kalabotan sa confidential funds, grave threats ug bribery.
Gilauman nga sugdan sa depensa ang pagpresentar sa ilang mga ebidensya sa Nobyembre 9, sa pagpadayon sa impeachment trial, diin ang Senado isip impeachment court maoy mohukom kon igo ba ang mga ebidensya aron mapamatud-an ang nahibiling mga alegasyon.
