Padayon sa pagpasikat sa ngalan sa Pilipinas sa internasyonal nga entablado ang P-pop group nga SB19 human mahimong unang Filipino group nga mopahigayon sa ceremonial first pitch sa usa ka dula sa Major League Baseball sa Estados Unidos.
Ang grupo nga gilangkuban nila Pablo, Stell, Ken, Josh, ug Justin maoy mohulog sa ceremonial first pitch sa duwa tali sa Chicago White Sox ug New York Yankees sa Hulyo 29 sa Rate Field sa Chicago.
Gipasabot kini sa grupo pinaagi sa ilang Global Promo Tour schedule nga naglatid sa ilang mga kalihokan sa Hulyo ug Agosto, lakip ang performance sa Grammy Museum sa Hulyo 28, ilang debut sa Lollapalooza sa Hulyo 30, mga fan meet sa Estados Unidos ug Japan, ug pag-apil sa Summer Sonic.
Pinaagi niini, miapil ang SB19 sa mubo nga talaan sa mga Pilipinong personalidad nga nakahimo na usab sa ceremonial first pitch sa MLB, sama nila Manny Pacquiao, Liza Soberano, ug Jo Koy.
Dali usab nga gibahaan sa mga mensahe sa pagpasalamat ug suporta ang social media gikan sa ilang fanbase nga A’TIN, samtang nagpadayon ang pagpalapad sa internasyonal nga presensya sa grupo human sila mapailalom sa representasyon sa United Talent Agency, usa sa labing inila nga entertainment ug talent agencies sa kalibotan.
