Giingon sa kampo ni Vice President Sara Duterte nga normal lamang ang daghang objection nga ilang gipasaka atol sa ikaduhang adlaw sa impeachment trial, bisan pa nga kadaghanan niini wala gidawat sa impeachment court.
Matod ni Atty. Michael Poa, tigpamaba sa defense team, kasagaran gyud nga adunay mga objection sa bisan unsang korte o pagdungog, ilabina kung gipangutana na ang mga saksi.
Gipasabot ni Poa nga nag-object sila tungod kay ilang gituohan nga adunay mga leading questions ang prosecution sa pagpangutana kang NBI Senior Agent John Mark Calilung nga mipresentar sa digital nga ebidensya.
Dugang pa niya, dili importante sa depensa kung dawaton o isalikway sa korte ang ilang objection. Ang importante, matod niya, marekord ang ilang posisyon sa opisyal nga rekord sa impeachment court.
Samtang, niadtong Hulyo 7, gihangyo ni presiding officer Senador Francis “Chiz” Escudero ang abogado sa depensa nga magpakita og dugang pasensya samtang nagapangutana ang House prosecutor nga si Atty. Amando Virgil Ligutan sa saksi.
Giingon usab ni Poa nga sayo pa aron hisgutan kung kinsa ang nagdaog o napildi sa pagdungog, ug dili nila kini tan-awon isip kompetisyon tungod kay nagpadayon pa ang impeachment proceedings.
