Kusog ang indikasyon nga wala pa mobiya sa Pilipinas si Senador Ronald “Bato” dela Rosa.
Sumala ni National Bureau of Investigation (NBI) Director Melvin Matibag, ilang gisubay ang impormasyon o mga lead bahin sa posibleng nahimutangan sa senador.
Gipasabot sa NBI Director nga lisod alang kang dela Rosa ang pagbiya sa Pilipinas tungod kay ang International Criminal Court (ICC) adunay mga miyembro sa 132 ka mga nasud.
Si Dela Rosa karon nag-atubang og arrest warrant gikan sa ICC human ginganlan nga usa sa mga giingong kauban ni kanhi Presidente Rodrigo Duterte sa kaso sa krimen batok sa katawhan nga naggikan sa giingong liboan ka mga pagpatay ubos sa gubat batok sa droga sa miaging administrasyon.
Samtang, gisubli ni Matibag nga wala pa silay nadawat nga dugang nga mga arrest warrant gikan sa ICC. Kini ang tubag sa NBI Director sa dihang gipangutana bahin sa giingong warrant nga gi-isyu batok kang Sen. Bong Go.
Gipaniguro ni Matibag nga ang warrant of arrest alang kang Sen. Bato ra ang ilang naa.
