Nibalik ang gobyerno sa Pilipinas sa international debt market pinaagi sa pagpagawas og tulo ka matang sa US dollar-denominated bonds aron masuportahan ang panginahanglan sa pondo sa nasud.
Sa pahayag sa Bureau of the Treasury (BTr), gilunsad ang fixed-rate securities o gitawag nga Global Bonds nga adunay 5.5 ka tuig, 10 ka tuig ug 25 ka tuig nga termino.
Ikaduha na kini nga pagsulod sa gobyerno sa international debt market karong 2026, human sa una nilang triple-tranche bond offering niadtong Enero.
Sumala sa BTr, ang 25-anyos nga bond usa ka dugang nga pagpagawas sa kasamtangang 5.750 percent US dollar bonds nga mo-mature sa tuig 2051 ug unang gi-isyu niadtong Enero karong tuig.
Gipahibalo usab sa Treasury nga ang inisyal nga price guidance alang sa 5.5-anyos nga bond gitakda sa 85 basis points ibabaw sa US Treasury benchmark, samtang 125 basis points alang sa 10-anyos nga bond.
Alang sa 25-anyos nga bond, gitakda ang yield sa 6.100 percent. Gilauman nga mapresyohan ang maong transaksyon atol sa trading session sa New York sa Hunyo 16, 2026.
