Nagmalampuson ang gipahigayon nga relief distribution activity ilawom sa Oplan Kabalaka sa Bombo Radyo Philippines ug Bombo Radyo Philippines Foundation Incorporated alang sa mga residenteng naapektuhan sa magnitude 7.8 nga linog nga miigo niadtong Lunes.
Gipahigayon ang maong kalihokan ganihang adlawa sa Holy Cross Parish sa Calumpang, General Santos City, diin gatusan ka mga residente ang mitambong aron makadawat sa hinabang. Lakip sa mga benepisyaryo ang mga kabataan, mga hamtong, ug mga senior citizen nga matag usa nakadawat og lima ka kilo nga bugas.
Dako ang kalipay ug pagpasalamat sa mga residente nga nakadawat sa maong ayuda. Matud pa kanila, dako kining tabang alang sa ilang mga pamilya ilabina nga daghan kanila ang naglisod pa sa pagbangon gikan sa epekto sa kusog nga linog nga mipahinabo og kahadlok ug kabalaka sa komunidad.
Bisan pa sa ilang nasinati nga kalisdanan ug trauma tungod sa kalamidad, nagpabiling lig-on ang espiritu sa mga residente. Ang ilang determinasyon ug paglaum sa kinabuhi nagpamatuod nga dili mapildi sa mga pagsulay ang katawhan sa General Santos City.
Gawas sa pagpanghatag og bugas, gipadayag usab sa mga benepisyaryo ang ilang dakong pasalamat sa Bombo Radyo Philippines ug sa Bombo Radyo Philippines Foundation Incorporated tungod sa ilang padayon nga pag-abot sa mga komunidad nga nanginahanglan og suporta ilabina sa mga panahon sa kalamidad.
Samtang nagpadayon ang mga paningkamot sa pagtabang sa mga naapektuhan sa linog, naglaum ang mga residente nga magpadayon ang panaghiusa ug pagtinabangay sa komunidad aron mas paspas silang makabangon gikan sa mga hagit nga ilang giatubang.
