GENSAN- Padayon ang pagtaas sa bilang sa mga naapektuhan sa magnitude 7.8 nga linog sa Mindanao samtang nagpadayon ang monitoring ug response operations sa Office of the Civil Defense o OCD.
Sumala sa OCD, as of 3:00 PM sa Hunyo 9, 2026, mikabat na sa 1,209 ang recorded aftershocks nga adunay magnitude gikan 1.3 hangtod 6.4.
Nisaka na usab sa 38 ang namatay, upat ang missing, samtang 478 ka mga indibidwal ang nasamdan tungod sa linog. Dili pa maagian hangtud karun sa mga sakyanan ang dalan gikan sa General Santos City paingon sa Glan, Sarangani Province.
Sumala ni Rodrigo Sosmeña, Regional Director sa Office of the Civil Defense (OCD) 12, kini tungod sa nagubang tulay ug mga landslide nga nakaapekto sa mga dalan, hinungdan nga ang Sarangani maoy labing grabeng naapektuhan ug adunay pinakadaghan nga namatay.
Sa kasamtangan, mikabat na sa P562.8 million ang initial nga kadaot sa imprastraktura sa Regions 11 ug 12, samtang 2,784 ka personnel gikan sa AFP, PNP, Coast Guard ug Bureau of Fire Protection ang gipakatap alang sa search, rescue ug retrieval operations.
Dugang pa sa OCD, 115 ka assets na ang deployed ug kapin 25,461 ka mga indibidwal na ang natabangan sa nagpadayon nga operasyon sa gobyerno.
