Nasakmit sa mga otoridad ang mokabat sa 24.8 ka kilo nga gituohang marijuana kush nga nagkantidad og P24.79 milyon sa duha ka managlahing operasyon sa Ninoy Aquino International Airport (NAIA) Terminal 3.
Nadakpan ang usa ka Amerikanong pasahero nga gikan sa Bangkok, Thailand niadtong Oktubre 29 human makit-an sa iyang duha ka bagahe ang 15 ka pakete sa gituohang marijuana kush nga motimbang og 17,464 gramos ug nagkantidad og P17.46 milyon.
Gitago ang ilegal nga droga sulod sa mga pakete sa pagkaon, apan nadiskobrehan kini human makit-an sa X-ray screening ang kadudahang sulod sa bagahe ug nagpositibo usab sa inspeksyon sa K9 unit.
Sa laing operasyon, nasakmit usab sa mga otoridad ang laing 7,335 gramos nga gituohang marijuana kush nga nagkantidad og P7.33 milyon gikan sa gibiyaang bagahe nga gikan usab sa Bangkok.
Gipahigayon ang duha ka operasyon sa Bureau of Customs, Philippine Drug Enforcement Agency ug NAIA Inter-Agency Drug Interdiction Task Group.
