Nanawagan si MSU Prof. Mario Aguja ngadto sa publiko nga magpabiling maalamon ug responsable sa pagtan-aw sa mga nagakahitabo karon sa nasud pinaagi sa padayong pagbasa ug pagsubay sa mga balita ug impormasyon.
Matud ni Aguja, importante nga dili lamang kutob sa pagpaminaw o pagbasa ang buhaton sa katawhan kundili kinahanglan usab nga i-analyze ang matag isyu aron masabtan pag-ayo ang sitwasyon ug mahibaluan unsay angay nga baruganan ug aksyon isip responsableng lungsoranon.
Gipasabot usab niya nga dakong papel ang hustong paghusga o judgment sa katawhan sa pagpalig-on sa demokrasya ug sa pag-atubang sa mga hagit nga giagian sa nasud.
Dugang niya, ang kahibalo ug kritikal nga pagtan-aw sa mga isyu makatabang aron malikayan ang sayop nga impormasyon ug dili dayon mailad sa mga dili tinuod nga balita.
