Nakapahigayon og talagsaong “dog pool party” ang usa ka dog park sa Miami-area aron mosulay sa pagbreak sa Guinness World Records title alang sa pinakadakong panagtapok sa mga iro nga naglangoy sa pool.
Ang kalihokan nga gitawag og “Chewy Summer Social” gipahigayon sa Chewy Bark Park nga kabahin sa The Underline linear park sa Coral Gables niadtong Sabado.
Mikabat sa 277 ka iro nga adunay nagkalainlaing gidak-on ang mitambong ug naligo sa mga kiddie pool nga giandam alang kanila.
Adunay usab Guinness World Records adjudicator nga personal nga nagtala ug nag-ihap sa mga iro nga miapil sa maong kalihokan.
Sumala sa mga organisador, igo ang gidaghanon sa mga iro aron opisyal nga makabutang og bag-ong Guinness World Record alang sa “world’s largest dog pool party.”
Dugang pa, ang libre nga event adunay mga treats, awit, dula ug uban pang summer activities nga gikalipay sa mga tag-iya ug sa ilang mga binuhing iro.
