Gitay-og sa kusog nga linog ang habagatang bahin sa Panama, nga unang gibanabana sa magnitude 8.0 apan giusab ngadto sa magnitude 7.6 sa ulahing report sa United States Geological Survey
Tungod sa linog, gipagawas ang tsunami warning sa pipila ka dapit sa kasadpang baybayon sa Central ug South America.
Nahimutang ang sentro sa linog mga 14 ka kilometro sa habagatan-kasadpan sa hilit nga komunidad sa Pitaloza Arriba, duol sa habagatang tumoy sa Panama.
Sumala sa Institute of Geosciences sa University of Panama, nahitabo ang linog wala pa moabot ang ala-una sa hapon, lokal nga oras, duol sa lungsod sa Tonosí. Usa pa ka linog nga may magnitude 6.0 ang natala alas-1:22 sa hapon.
Gikataho nga gipagawas ang mga tawo gikan sa mga building, eskwelahan ug mga balay sa nagkadaiyang bahin sa nasud tungod sa kusog nga pag-uyog sa yuta.
Kusog usab nga nabati ang linog sa kapital nga Panama City, diin nanggawas ang mga residente sa mga building samtang naghulat sa dugang impormasyon kabahin sa epekto niini.
Gipasidan-an sa USGS nga posibleng maigo sa delikadong mga balod ang mga baybayon sa Costa Rica, Ecuador, Peru, Nicaragua, Guatemala, El Salvador ug Mexico.
