GENSAN – Nagpahimangno ang Office of Civil Defense (OCD) 12 sa tanang Local Government Units (LGUs) nga mag-andam ug magdoble pag-amping tungod sa El Niño Alert nga nakaapekto karon sa nasod.
Gipasiugda ni OCD 12 Regional Director Rodrigo O. Sosmeña ang kahinungdanon sa sayong pagplano ug koordinasyon aron mapamenosan ang epekto sa grabeng kainit ug hulaw.
Sumala kaniya, kinahanglan tutukan sa LGUs ang pagtigom ug pagtipid sa kuryente, husto nga pagdumala sa suplay sa irigasyon para sa mga mag-uuma, ug pagpahugot sa pagbantay sa kahimsog sa katawhan ilabi na sa posibleng epekto sa sobrang kainit sa lawas.
Gipanghimatuud usab niya nga ang koordinasyon sa mga ahensya sa gobyerno importante aron masiguro ang paspas nga aksyon ug tabang kon adunay maapektuhan sa El Niño.
Gihangyo sa OCD 12 ang publiko nga magpabiling alerto, magtipid sa tubig ug kuryente, ug mosunod sa mga pahimangno sa lokal nga kagamhanan aron malikayan ang grabeng epekto sa hulaw ug init sa panahon.
