ALABEL,SARANGANI- Nanawagan og hustisya ang pamilya sa duha ka mag-uuma nga namatay atol sa tradisyonal nga ritwal nga gitawag og “Sulif” sa Glamang River, Barangay Datal Anggas, Alabel, Sarangani Province, human molutaw ang mga pangutana kalabot sa gidugayon sa ilang pagpabilin ilalom sa tubig.
Sa pakighinabi kang Jun Mansag, pag-umangkon ni Tonny Bulanon Mansag, usa sa mga biktima, iyang giingon nga angay unta nga ang National Commission on Indigenous Peoples o NCIP ang modesisyon kalabot sa panaglalis sa yuta, imbes nga ang mga opisyal sa Barangay Datal Anggas ang magbuot sa resulta sa ritwal.
Gibanabana usab niya nga mokabat sa 15 ka ektarya ang gilalisang luna sa yuta sa duha ka pamilya.
Gikuwestiyon usab ni Mansag ang gidugayon sa ritwal, diin sumala kaniya, duha lamang ka minutos ang gitugot sa balaod sa ilang tribo alang sa paglubog ilalom sa tubig ug kon dili kini makaya, giisip nang tabla ang resulta.
Apan matod niya, miabot sa walo ka minutos ang paghulat sa wala pa gitabangan ang mga mag-uuma.
https://www.facebook.com/share/v/18hbM1WMui/
Samtang, gikuwestiyon usab ni Michelle Palasanon, anak ni Gaspar Tusan Palasanon, ang gidugayon sa ritwal ug miingon nga duha hangtod tulo lamang ka minutos unta ang angay nga pagpabilin ilalom sa tubig.
Matod niya, adunay misinggit nga nilapas na sa gitakdang oras, apan wala kini tagda tungod kay nagsunod lamang ang mga mag-uuma sa mando sa kapitan.
https://www.facebook.com/share/v/19AqWdS6Ua
Gibutyag ni Michelle nga patay na si Tonny Mansag sa dihang gipagawas gikan sa tubig, samtang luya na kaayo ang iyang amahan sa dihang nakuha ug gidala sa ospital. Namatay si Gaspar bandang alas tres sa hapon, sumala sa iyang anak.
