Nakasinati og pagbaha ang pipila ka lugar sa General Santos City human sa kusog nga pag-ulan kaganina sa hapon, diin naningkamot ang pipila ka lumulupyo sa pagluwas sa usa ka baka nga naanod sa kusog nga sulog sa baha.
Tungod sa pagsaka sa lebel sa tubig, temporaryong dili na maagian sa bisan unsang matang sa sakyanan ang tulay sa Purok 2, Barangay Upper Labay.
Sa advisory nga gipagawas sa barangay, gipahimangnoan ang mga residente ug motorista nga likayan ang maong tulay ug mangita og alternatibong ruta aron malikayan ang posibleng disgrasya.
Gipahinumdoman usab ang publiko nga mag-amping panahon sa pagbaha ug likayan ang pagsulod sa kusog nga haguros sa tubig, bisan pa sa tinguha nga moluwas og tawo o mananap, aron dili usab mameligro ang ilang kaugalingong kinabuhi.
