Angayan nga mag-amping ang katawhan, ilabi na sa dakbayan sa Heneral Santos, tungod sa grabe nga kainit nga nasinatian nga niabot sa 41°C ang heat index .
Sumala ni Binrio Biñan, Chief Weather Observer ug Meteorologist sa PAGASA–GenSan, delikado ang sobra nga pagkabulad sa init kay mahimong hinungdan sa heat stress ug heatstroke nga posibleng moresulta sa komplikasyon o kamatayon, labi na sa mga adunay sakit sama sa hypertension.
Iyang gipasabot nga kung dili malikayan ang pagbulad sa adlaw, sama sa mga trabahante nga anaa sa gawas, kinahanglan nga mag-amping ug likayan ang taas nga oras sa kainit.
Tambag usab niya nga mag-inom og daghang tubig aron malikayan ang dehydration ug uban pang epekto sa init sa lawas.
Gidasig ang publiko nga sundon ang mga pahimangno aron maprotektahan ang ilang kahimsog batok sa epekto sa grabe nga kainit.
