Daghang mga tawo ang wala mouyon sa direksyon sa administrasyon ni U.S. President Donald Trump, ilabi na sa mga isyu sa immigration ug seguridad, nga posibleng nakaresulta og tensyon ug hulga batok sa pangulo.
Sumala ni Luisa Milone, Bombo International Correspondent sa USA, mao kini ang iyang gitan-aw nga posibleng motibo sa nahitabong pagpamusil sa usa ka armadong lalaki atol sa White House Correspondents’ Dinner kagahapong adlawa, diin anaa si Trump uban sa ubang mga opisyal sa maong nasud.
Matod pa niya, ang nagkalain-laing reaksyon sa publiko sa mga polisiya sa administrasyon mahimong nakaamot sa pagsaka sa tensyon nga misangpot sa maong insidente. Bisan pa niini, gikumpirma sa mga awtoridad nga luwas ang pangulo ug ang ubang mga opisyal human sa hitabo.
Sa pagkakaron, padayon ang imbestigasyon aron matino ang tinuod nga motibo sa suspek ug aron masiguro ang kaluwasan sa mga high-profile nga kalihokan sa gobyerno.
