Nagpahigayon na og imbestigasyon ang National Bureau of Investigation (NBI) mahitungod sa mga gibutyag ni Ramil Madriaga nga giingong adunay plano sa pagpatay kang Presidente Ferdinand Marcos Jr.
Sumala sa iyang supplemental affidavit nga gisumite sa House Justice Committee, giingon ni Madriaga nga si kanhi Presidente Rodrigo Duterte giingong nagplano og assassination ug kudeta kung dili mobiya sa pwesto ang Presidente sa tuig 2025.
Giapil usab sa imbestigasyon ang naunang pahayag ni Davao City Mayor Sebastian “Baste” Duterte nga giingong “ang gusto lang nila mao ang ulo ni Marcos.”
Giingon ni NBI Director Atty. Melvin Matibag nga ilang susihon ang tibuok detalye sa mga alegasyon ug magpagawas og memorandum bahin niini. Giila sa NBI nga seryoso ang maong mga pahayag tungod kay direktang naghisgot kini og hulga batok sa Presidente sa nasud.
