GENSAN- Naglatag og tulo ka nag-unang panawagan ang transport sector sa nasud dungan sa padayon nga pagsaka sa presyo sa mga produktong petrolyo, sumala ni Orly Sabelita, ang chairman sa Gensan Federation of Transport Cooperatives.
Sa interbyu sa Bombo Radyo, gipasabot ni Sabelita nga dili igo ang kasamtangang ₱5,000 nga ayuda gikan sa kagamhanan para sa mga tsuper ug operator.
Matud pa niya, lakip sa ilang nag-unang panawagan ang pagpahimutang og price cap sa krudo ug gasolina, diin ilang gisugyot nga i-presyo lang og ₱55 matag litro ang krudo para sa pampublikong transportasyon, ug ang bisan unsang kantidad nga molapas niini kinahanglan nga abagahon sa subsidiya sa gobyerno.
Gawas niini, gihangyo usab sa sektor ang temporaryo nga pagsuspinde sa excise tax ug Value Added Tax (VAT) sa mga produktong petrolyo. Sumala ni Sabelita, bisan og naapil sa suspensyon ang kerosene ug LPG, wala man malakip ang diesel ug gasolina nga mao gyud ang nag-unang gigamit sa mga pampasaherong sakyanan.
Sa laing bahin, nagpadayag usab og suporta ang ilang grupo sa gihimong nationwide transport strike sa mga grupong PISTON ug Manibela. Apan, giklaro nila nga wala sila dayon nakasalmot sa welga sa ubang rehiyon tungod sa kakuwang sa preparasyon ug sa ilang obligasyon ngadto sa mga pasahero.
Gihatagan og gibug-aton ni Sabelita nga dili nila gusto nga ipasa ang dugang palas-anon ngadto sa mga commuter, apan nag-atubang usab og dako nga hagit ang ilang sektor sa pagtubag sa adlaw-adlaw nga gastuhan.
Tungod niini, gisubli sa mga transport group ang panawagan nga i-lift ang suspensyon sa provisional fare increase nga naaprobahan niadtong Marso 13.
Ilang gihangyo ang dugang nga ₱5 sa minimum nga pamahe, aron gikan sa ₱15 mahimo na kini nga ₱20, samtang sa mga traditional jeepney usab, gikan sa ₱13 mahimo kini nga ₱18.
Gisugyot usab nila ang ₱3 nga dugang sa matag mosunod nga kilometro. Nanghinaot ang sektor nga kung dili man gani dayon mahatag sa gobyerno ang sapat nga subsidiya, mapatuman man lang ug madungagan ang provisional fare increase aron mogaan ang ilang pinansyal nga kalisod.
