Patay ang usa ka 46-anyos nga lalaki samtang naangol apan anaa na sa luwas nga kahimtang ang iyang 43-anyos nga asawa human sila gipusil alas 4:20 sa kaadlawon ning adlawa sa Abril 11, 2026 sa Purok 8, Barangay Bizmarts, Don Carlos.
Base sa inisyal nga imbestigasyon sa Don Carlos Municipal Police Station, nangandam sa trabaho ang magtiayon dihang ilang namatikdan ang pagduol sa usa ka wala mailhing lalaki sa ilang puluy-anan, ug kalit kining mipabuto og tulo ka higayon sa wala pa misibat sakay og motorsiklo.
Ang bana nakaangkon og samad pinusilan sa tuo nga paa nga maoy hinungdan sa iyang kamatayon ug gideklarang dead on arrival sa ospital, samtang ang asawa nakaangkon og mga samad sa duha ka paa ug sa wala nga bahin sa hawak apan anaa na sa stable nga kondisyon.
Giingon sa kapulisan nga wala na gipahigayon ang SOCO processing tungod kay nahugawan na ang crime scene sa mga tawo nga unang misulod sa lugar, bisan pa man narekober ang duha ka basiyo sa bala nga ipadala sa Provincial Forensic Unit alang sa ballistic examination.
Sa pagkakaron, ang patayng lawas anaa na sa kustodiya sa Adlawan Funeral Homes samtang padayon ang lawom nga imbestigasyon aron mailhan ang suspek ug masuta ang motibo sa krimen.
