GENSAN – Giangkon ni Orly Sabelita, General Manager sa Metro Gensan Transport Cooperative, nga dako ang epekto sa kasamtangang krisis sa transportasyon ngadto sa mga drayber ug miyembro sa kooperatiba, ilabi na kadtong nanag-iya og mga multicab.
Tungod sa kalisod, napugos ang pipila ka drayber sa pagpakunhod sa ilang biyahe ug mugawas na lamang kon panahon sa “rush hour” aron makadaginot.
Bisan pa niini, gipasalig ni Sabelita nga paningkamutan sa kooperatiba nga mapadayon ang ilang serbisyo ngadto sa riding public isip bahin sa ilang obligasyon sa prangkisa, bisan pa man kon dili sigurado kon hangtud kanus-a makasugakod ang sektor sa maong sitwasyon.
Matud pa niya, nagpadayon usab ang koordinasyon sa ilang grupo uban sa LGU ug mga ahensya sa gobyerno aron makapangayo og dugang tabang ug klarong solusyon sa krisis sa gasolina.
Nagpasidaan usab siya nga kung molala pa ang kahimtang, posibleng maapektuhan ang regular nga biyahe ug serbisyo sa publiko sa umaabot nga mga adlaw.
