Nakasinati og halos zero visibility ang pipila ka motorista human nag-leak ang liquefied carbon dioxide gikan sa usa ka tanker truck nga naaksidente sa Brgy. Nagpan, Malungon, Sarangani pasado alas-6 sa buntag karong adlawa Lunes, Marso 9.
Sumala sa report, mikatag ang puti ug mabaga nga aso gikan sa tangke sa trak nga nagdala og liquefied carbon dioxide, hinungdan nga halos wala na’y makita ang mga motorista nga miagi sa maong dalan.
Tungod niini, naapektuhan ang pagbiyahe sa pipila ka sakyanan samtang giampingan usab ang mga tawo sa palibot sa lugar aron malikayan ang posibleng peligro.
Sa maong insidente, nasamdan ang driver sa tanker truck ug usa pa ka kauban niini. Gidala dayon sila sa duol nga ospital aron matambalan.
Dali usab nga rumesponde ang mga operatiba sa Malungon Municipal Police Station ug ang Bureau of Fire Protection Special Rescue XII aron kontrolon ang sitwasyon ug siguruhon ang kaluwasan sa mga motorista ug residente sa maong lugar.
Padayon pa karon ang imbestigasyon sa mga otoridad aron matino ang hinungdan sa aksidente sa tanker truck.
