Hugot nga gibarugan sa aktres ug model nga si Anne Curtis ang iyang katungod isip babaye human niya gisaway ang giisip nga “non-apology” ni Quezon City Representative Bong Suntay.
Kini human nag-viral ang kontrobersyal nga pamahayag sa magbabalaod sa usa ka pagdungog sa Kongreso, diin gigamit ni Suntay si Anne isip ehemplo sa iyang “sexual fantasy” samtang gidepensahan ang laing isyu sa politika.
Sa iyang opisyal nga pahayag, gihulagway ni Curtis nga ang mga pulong ni Suntay usa ka pagpakita sa ‘misogyny’ ug pag-ubos sa dignidad sa mga kababayen-an.
Matod pa sa aktres, dili mahimong himuong rason ang “joke” aron pakaulawan ang usa ka babaye. Gipasiugda ni Anne nga ang matag babaye, bisan unsa pa ang ilang trabaho angay hatagan og ensaktong respeto.
Dugang pa niya, ang nahitabo kaniya usa ka dakong pahinumdom nga bisan ania na kita sa Women’s Month, layo pa ang biyahe sa pagkab-ot sa tinuod nga pagtahod sa katungod sa mga babaye.
Gawas sa iyang personal nga kasinatian, gipahinumdoman usab ni Anne ang publiko nga ang maong klase sa pambastos mahitabo matag adlaw sa trabahoan, sa kadalanan, ug bisan sa mga online platforms.
Sa pagkakaron, nakadawat og daghang pagsaway si Rep. Bong Suntay gikan sa nagkalain-laing sektor, lakip na ang Philippine Commission on Women (PCW) ug ang grupo nga Gabriela, kinsa miingon nga ang iyang mga pulong usa ka matang sa objectification sa kababayen-an nga dili angay palabyon.
