Gihinganlan ni Julian Nicholls, Senior Trial Lawyer sa International Criminal Court (ICC), ang mga kaubang kriminal sa giingong pagpatay atol sa paglingkod ni kanhi Presidente Rodrigo Duterte isip mayor sa Davao City.
Sa unang adlaw sa pagkumpirma sa mga kaso, iyang gibutyag ang papel ni Senador Ronald “Bato” Dela Rosa nga nagsilbing hepe sa Davao City Police Office niadtong panahona.
Samtang si Senador Christopher “Bong” Go mao ang special assistant ug adviser ni Duterte niadtong panahona.
Gihinganlan usab ang kanhi hepe sa pulisya sa Davao nga si Vicente Danao, kanhi National Bureau of Investigation (NBI) Davao Regional Director nga si Dante Gierran ug si Atty. Vitaliano Aguirre II.
Sa Document Containing the Charges (DCC) nga gisumite sa prosekusyon ug gipagawas sa ICC sa miaging semana, sila si Go, Dela Rosa, Danao, Gierran ug Aguirre ginganlan nga mga kaubang kriminal sa laraw nga hingpit nga ma-neutralize ang mga kriminal pinaagi sa pagpatay kanila.
Apil usab sa dokumento isip mga kaubang kriminal mao ang kanhi hepe sa PNP nga si Oscar Albayalde ug Isidro Lapena.
Dugang ni Nicholls nga adunay sistema nga gisunod ni Duterte diin giumol ang Davao Death Squad (DDS).
Miingon siya nga ang papel sa mga kauban nga naghimo niini mao nga sila ang nag-isyu og mga mando gikan ni Duterte sa paghimo sa mga pagpatay, diin ang mga miyembro mga pulis ingon man mga hitmen nga naghimo sa mga pagpatay.
Sa ikaduhang adlaw sa husay, miingon siya nga ang mga prosecutor sa ICC magdetalye sa pipila ka mga detalye sa mga kakunsabo ni Duterte sa iyang nagpadayon nga gubat batok sa droga
