Gipahibalo sa Malacañang nga walay holiday break si Presidnte Ferdinand Marcos Jr. aron personal nga susihon ang 2026 national budget. Matud sa Palasyo, gipili sa Pangulo nga ipahinungod ang iyang oras bisan sa panahon sa kapistahan aron masiguro nga hustong magamit ang pondo sa gobyerno ug makatubag sa tinuod nga panginahanglan sa katawhan.
Sumala sa Malacañang, maampingong gitan-aw sa Pangulo ang matag detalye sa proposed national budget, ilabi na ang mga alokasyon alang sa edukasyon, panglawas, imprastraktura, ug social services. Gi-hingusgan nga importante alang kang Pangulong Marcos nga masiguro nga walay sayop o iregularidad sa paggasto sa pondo sa nasud.
Dugang pa sa Palasyo, ang maong lakang nagpamatuod sa dedikasyon sa Pangulo sa responsableng pagdumala sa pondo sa gobyerno, ilabi na nga ang 2026 national budget giila nga hinungdanon alang sa dugay nga kalamboan sa nasud.
Gilauman nga human sa hingpit nga pagbusisi sa budget, pirmahan dayon kini sa Pangulo sa hustong panahon aron masugdan ang implementasyon sa mga programa ug proyekto nga makatabang sa katawhan.
