Gibutyag ni Baguio City Mayor Benjamin Magalong nga ang pamilya sa kanhi DPWH Undersecretary Maria Catalina Cabral dili gusto nga ipa-autopsy ang iyang patayng lawas.
Sumala sa mayor, nakadesisyon na ang pamilya niini.
Sukwahi kini sa naunang report sa Department of Interior and Local Government (DILG) nga ang patayng lawas sa namatay nga undersecretary gipailalom na sa autopsy.
Si Magalong, kinsa nagsilbi usab nga pangulo sa Criminal Investigation and Detection Group, miinsistir nga mas maayo unta nga ipa-autopsy ang patayng lawas sa namatay nga opisyal, labi na kay kadudahan ang insidente sa iyang kamatayon.
Hangtod karon, nagpabilin nga misteryo kung naghikog ba ang kanhi opisyal o kung adunay foul play sa iyang kamatayon human makuha ang iyang patayng lawas gikan sa usa ka bangin sa lungsod sa Tuba, Benguet kagabii (Disyembre 18).
Ang Independent Commission for Infrastructure kaniadto pa usab nga miapelar alang sa usa ka hingpit nga imbestigasyon sa kamatayon sa kanhi opisyal aron mahibal-an kung adunay foul play nga nahitabo.
Ang drayber ni Cabral nga si Ricardo Munos Hernandez, nagpabilin nga naa sa kustodiya.
Gituohan nga si Hernandez ang katapusang nakakita kang Cabral sa wala pa kini makit-i nga patay.
