GENSAN– Morag nahimong eksena sa usa ka pelikula ang gihimong paggukod sa mga kapulisan sa sakyanan nga gisulayan matod pa og karnap sa usa ka lalaki.
Matod ni PMaj. Ari Noel Cardos, station commander sa Fatima Police Station, malampusong na-corner ang usa ka 2025 Bullet proof Nissan Patrol nga gikaingong gi-karnap sa suspek sa Purok Maunlad, Barangay Apopong.
Na-intercept ang sakyanan sa may bahin sa Zone 9-A, Blk 7, Barangay Fatima Gensan pasado alas 10:00 sa buntag.
Gibutyag sa nasampit nga opisyal, gi-flash alarm ang sakyanan sa Makar Police Station og dayong gipahigayon sa ginsakpan sa Makar Police Station, Tambler Police Station og 1201st Regional Mobile Force Battalion ang hot pursuit operation.
Samtang gisundan sa mga patrol cars ang sakyanan, gimandoan ang suspek nga si Jimar Taburnal, hamtong ang pangidaron, og residente sa Bukidnon nga muhunong apan wala mituman inay nagpakusog hinuon sa pagpadagan hangtod nga naapsan sa may Brgy. Fatima og kini nasikop.
Subay sa inisyal nga pag-imbestiga sa kapulisan, ang suspek kanhing trabahante sa tag-iya sa sakyanan nga giila nga si Randy Belasa Sunico, 47 years old, minyo, negosyante og residente sa Teachers Village, Brgy Fatima, Gensan.
Sa karon, balhog sa Fatima Police Station ang suspek nga mag-atubang sa kasong carnapping og damage to property.
