Nisaka ngadto sa usa ka pormal nga kaso ang dugay nang gihungihong nga away tali sa managsuong Kim Chiu ug Lakambini “Lakam” Chiu , human ang aktres-host nagsang-at og kasong kriminal alang sa qualified theft tungod sa giingong seryosong pinansyal nga kalainan sa ilang negosyo.
Si Kim giubanan sa iyang mga abogado sa dihang nagsumite siya og reklamo, ug ebidensya sa Office of the Assistant City Prosecutor sa Quezon City.
Wala nganli sa legal counsel ni Kim ang negosyo nga nalambigit, apan miingon nga kini naglambigit sa dugay nang gihungihong nga negosyo sa bag nila ni Kim ug Lakam.
Ang kampo ni Kim miingon usab nga ang nawala nga pundo ang ‘ substantial amounts connected to her business assets..”
Gikumpirma usab nila nga ang pamilya misulay sa makadaghang higayon sa pagsulbad sa ilang problema sa internal, apan natapos gihapon sa pagsang-at og pormal nga reklamo.
Sumala sa report, si Lakam kabahin sa pagdumala sa negosyo sa managsuon.
Si Kim, sa laing bahin, emosyonal, nga nag-ingon nga iyang gipili ang transparency, accountability, ug pagpanalipod sa kompanya ug sa mga empleyado niini.
