Kapin sa 171,000 ka indibidwal o 47,000 ka pamilya gikan sa 53 ka barangay ang apektado gihapon sa magnitude 6.9 nga linog nga miigo sa dakbayan sa Sugbo niadtong Martes.
Matod sa Office of Civil Defense (OCD), gikan sa maong ihap, dul-an sa 4,000 ka pamilya o 20,600 ka indibidwal ang anaa pa sa gawas sa mga evacuation centers tungod sa aftershocks sa lugar.
Nunot niini, si OCD Deputy Administrator for Administration Asec. Bernardo Rafaelito Alejandro IV nipasalig nga ang National Disaster Risk Reduction and Management Council (NDRRMC) nagpadayon sa ilang operasyon aron sutaon ang kahimtang karon sa Bogo, Cebu, nga maoy labing nadaot sa linog.
Sa laing bahin, base sa inisyal nga assessment sa OCD, ang mga dapit sa Medellin, Sogod, Bogo City, ug Daanbantayan nanginahanglan karon og power generators, potable water, hygiene kits, tents, tarpaulins, flashlights ug batteries, food packs, ug bisan internet connectivity.
Kasamtangang gitutokan sa ahensya ug sa gobyerno ang tulo ka labing dinalian nga mga panginahanglanon sa mga apektadong lugar, partikular na ang pagpahiuli sa kuryente, komunikasyon, ug bisan ang panginahanglanon sa pabalay tungod sa kadaghan sa partially ug fully damaged nga mga balay ug imprastraktura sa lugar.
