Alex Eala wala niobra sa Indonesian player sa SP Open

Nahuman na ang kampanya ni Filipino tennis star Alex Eala sa SP Open sa Brazil.

Kini human siya gipildi ni Janice Tjen sa Indonesia 6-4, 6-1 sa quarterfinals sa nahisgutang torneyo.

Ang maong kapildihan mitapos sa pito ka sunod-sunod nga kadaugan ni Eala sukad nakadaog sa kampiyonato sa Guadalajara 125 Open niadtong Dominggo.

Sa unang set, gidomina ni Eala ang dula sa 3-0 hangtod nga nakarekober ang Indonesian nga magdudula ug nakauna.

Pagsulod sa ikaduhang set, midaog siya sa unang dula apan gilansang kini ni Tjen aron sa kataposan makaabante sa semifinals.

Sa pwesto nga 61, si Eala sunod mosalmot sa Jingshan Open sa China nga ipahigayon gikan sa Septiyembre 22 hangtod 28.