Nisaka na ang ihap sa namatay sa pagbuto sa usa ka pabrika sa rehiyon sa Ryazan, Russia ngadto sa 20 katao ug adunay 134 nga nasamdan.
Sumala ni Pavel Malkov, ang gobernador sa Ryazan, nagsugod ang insidente sa usa ka sunog sa workshop sa pasilidad.
Hinuon, wa pa matino kon unsa ang hinungdan sa sunog o unsa ang gihimo sa pabrika. Adunay mga taho sa hinungdan sa pagbuto sa pabrika, apan wala kini gikumpirma sa mga opisyal.
Sa pagkakaron, 31 sa mga naangol ang nagpabilin sa tambalanan samtang 103 ang nagpaalim sa outpatient.
Ang mga video gikan sa Russian Emergencies Ministry nagpakita sa gidak-on sa kadaot, uban sa mga bombero ug mga search dog nga nangita sa nahugno nga bahin sa bilding.
Naghatag usab og suporta ang mga psychologist sa mga apektadong residente. Samtang ang hinungdan sa insidente padayon pa nga giimbestigahan.
