Naabot na sa 1,254 ka kaso ang dengue nga natala sa dakbayan sukad sa pagsugod sa tuig, apan kini 1% nga mas ubos kung itandi sa kaparehong panahon kaniadtong milabayng tuig, base kana sa datos nga gipagawas sa City Health Office (CHO).
Gipahayag ni Dr. Lalaine Calonzo, sa CHO, nga nagpabilin silang aktibo ang sitwasyon bisan pa man sa gamay nga pagkunhod sa kaso. Pinakataas gihapon ang kaso sa dengue sa Barangay Calumpang, nga gisundan sa Labangal, San Isidro, Fatima, Lagao, Apopong, Mabuhay, Bula, Tambler, ug Sinawal.
Gipahimangnoan sa CHO ang publiko nga magpadayon sa 4S strategy batok dengue: Search and destroy mosquito breeding places, Self-protection, Seek early consultation, ug Support fogging sa hotspot areas.
Gi-awhag usab sa City Health Office ang tanang barangay officials ug residente nga maghimo og limpyong palibot, magtangtang og tubig nga mahimong pamuy-anan sa lamok, ug sigurohong limpyo ang sulod ug gawas sa panimalay.
Padayon ang kampanya sa CHO uban ang mga health center ug barangay health workers aron mapugngan ang pagsaka sa kaso sa dengue ilabi na sa panahon sa ting-ulan.
