Gipailawom sa preventive custody sa Police Regional Office 12 (PRO-12) ang lima ka pulis gikan sa Tambler Police Station (Police Station 5) sa General Santos City human malambigit sa reklamo nga pagpangilkil.
Base sa report, usa ka ginang ang nangayo’g tabang sa 911 Hotline sa Police Regional Office(PRO)12 human sila nga harangon sa mga pulis samtang sakay sa tricycle, kauban ang iyang anak nga buntis.
Sumala sa biktima, gikan sila sa Maasim, Sarangani Province og nangayo matod pa ang mga pulis og kuwarta para sa “pangmeryenda” bugti sa ilang gawasnong pag-agi.
Subo nga pamalandungon nga nakabsan sa kinabuhi ang iyang anak pag-abot sa ospital.
Tungod niini, gipasakaan na og kasong administratibo ang 5 ka pulis nga pulos adunay ranggo nga Corporal.
Samtang, nagpadayon ang makuting imbestigasyon sa PRO-12 aron sayron ang tibuok detalye sa insidente.
Gisiguro ni PBGen Arnold Ardiente, Regional Director sa PRO-12, nga dili palampason ang unsa mang matang sa korapsyon sa han-ay sa kapulisan.
Dugang pa ni Ardiente, gilayon nga gitangtang sa puwesto ang mga nalambigit nga pulis og gisiguro niya nga ang imbestigasyon, ginapahigayon nga patas, og transparent.
Gibutyag usab niya nga panubagon ang kinsa man nga mapamatud-an nga misupak sa balaud.
