Usa ka estudyante nga adunay autism ang nakagradwar isip summa cum laude sa De La Salle University, usa sa mga prestihiyosong unibersidad sa nasud.
Si Juan Alfonzo “Japonz” Dacumos, graduate sa Bachelor of Arts in Psychology, nakab-ot ang labing taas nga academic honor sa ilang batch.
Bisan pa sa iyang developmental condition, nagpakita siya og kaisog, determinasyon, ug disiplina nga mitultol sa iyang kalampusan.
Gidiagnose si Dacumos nga adunay autism spectrum disorder (ASD) sa dihang teen ager pa siya.
Apan imbes nga moatras, iyang gigamit kini nga inspirasyon aron motutok sa iyang tinguha nga makat-on, makab-ot ang iyang damgo, ug makatabang sa uban.
Matod ni Dacumos, dako ang papel nga giduwa sa iyang pamilya, mga magtutudlo, ug suporta sa eskwelahan aron makalahutay siya sa mga hagit sa pag-eskwela. Nagpasalamat usab siya sa iyang alma mater sa pagkahapsay sa ilang learning environment, nga inclusive ug supportive sa mga estudyante nga lahi og panginahanglan.
Giplanohan karon ni Dacumos nga ipadayon ang iyang edukasyon pinaagi sa graduate studies aron mahimong clinical psychologist ug mahimong tingog sa mga tawo nga ‘neurodivergent’.
Ang iyang istorya karon nagalibot sa social media ug nagahatag ug inspirasyon sa kadaghanan, ilabina sa mga ginikanan ug estudyante nga adunay kaparehas nga kahimtang.
