Mobalik sa kompetisyon ang Filipino gymnastics star nga si Carlos Yulo aron mangandam sa pagpakigbisog alang sa duha ka bulawang medalya sa finals sa men’s floor exercise ug vault events sa 2026 FIG Artistic Gymnastics World Championships sa Rotterdam, Netherlands.
Una siyang makigtigi sa floor exercise finals karong alas 8 sa gabii, human makakuha sa ikaduhang puwesto sa qualifying round nga adunay 14.500 puntos. Nanguna sa kwalipikasyon si Arsenii Dukhno sa Russia nga nakatala og 14.700 puntos.
Kauban ni Yulo sa walo ka finalists sila Artem Dolgopyat sa Israel, Frederick Richard sa United States, Jake Jarman sa Great Britain, Yahor Sharamkou sa Bulgaria, Noam Bercovich sa Israel ug Ryosuke Doi sa Japan.
Sa sunod nga adlaw, makigtigi usab si Yulo sa vault finals human makakuha sa ikaunom nga puwesto sa qualifying round nga adunay 14.266 puntos.
Nag-una sa kwalipikasyon sila Jake Jarman sa Great Britain ug Artur Davtyan sa Armenia nga parehas nakatala og 14.633 puntos. Misunod kanila sila Nazar Chepurnyi sa Ukraine, Arsenii Dukhno sa Russia ug Shohel Kawakami sa Japan.
Nakapasulod usab sa finals sila Sebastian Sponevik sa Norway ug Harry Hepworth sa Great Britain.
Aduna nay mga bulawang medalya si Yulo sa duha ka maong event sa miaging mga edisyon sa World Championships, diin nahimong kampiyon siya sa floor exercise niadtong 2019 ug sa vault niadtong 2021 ug 2025.
Gawas kang Carlos, miapil usab sa maong world meet ang iyang igsoon nga si Karl Eldrew Yulo, kauban sila Juancho Miguel Besana ug Haylee Garcia, apan wala sila makasulod sa finals.
