SARANGANI PROVINCE- Gidili na ang tanang porma sa online games sulod sa oras sa trabaho sa tanang kawani sa Lokal nga Pangagamhanan sa Malapatan, subay sa mando ni Mayor Salway Sumbo Jr.
Gipasabot sa alkalde nga ang maong lakang resulta sa iyang obserbasyon nga adunay mga empleyado nga dili na makafokus sa ilang trabaho tungod sa kalibog sa pagdula og online games gamit ang cellphone o computer sa opisina .
Lakip sa mga ginadiling dula mao ang Scatter ug uban pang susamang aplikasyon nga sagad makapaluya sa performance sa empleyado ug makahatag og daotang epekto sa serbisyo publiko .
Iyang giingon nga tanang masakpan nga motipas sa sugo mahimong atubangon og silot, lakip ang administrative case depende sa kalapasan.
Gibug-atonan sa mayor nga ang disiplina sa trabaho usa ka sukaranan sa epektibong serbisyo, ug kinahanglan nga ang tanang kawani magpakita og tinuod nga integridad ug dedikasyon, bisan pa sa ilang posisyon.
Ang mando epektibo dayon ug ipatuman sa tanang departamento ubos sa LGU Malapatan
