Giawhag ni Senador Migz Zubiri si President Bongbong Marcos nga mopagawas og posisyon kalabot sa gisugyot nga total ban sa online gambling.
Nagtuo si Zubiri nga dako kaayo ang baroganan sa presidente batok sa online gambling, sama sa dihang gidili ni kanhi Presidente Rodrigo Duterte ang e-sabong ug dihang gidili ni PBBM ang Philippine Offshore Gaming Operators (POGO) sa nasod.
Giangkon ni Zubiri nga gikinahanglan sa presidente ang political will ug ang pagpakita og “great leadership” sa pakigbatok sa online gambling ilabi na nga daghang gamhanan ug adunahang mga tawo sa katilingban ang maapektuhan.
Siya niingon nga ang presidente siguradong adunay daghang mga higala nga maapektuhan, busa ang gobyerno kinahanglan nga atubangon kini nga walay kahadlok o favoritism.
Kalabot niini, moapela usab si Zubiri alang sa paglakip sa gisugyot nga “Anti-Online Gambling Act of 2025” sa mga priority bills sa Legislative Executive Development Advisory Council (LEDAC).
Matud pa sa senador nga dili “worth it” ang social cost o negatibong epekto sa online gambling sa kinatibuk-an tungod kay matod niya adunay pagkunhod sa consumerism, pagkunhod sa paggamit sa enerhiya, ug labaw sa tanan, ang pagdaghan sa mga krimen nga may kalabutan sa mga sugal online.
